Sama sa gapnod kung molabay ang panahon. Gutlo lamang ang agian - ang lagiti sa kainit sa adlaw mahimong maghitak na sa tubig nga binanlas sa ulan. Ang tuba nga anaa sugong nga nagbitay sa palwa sa lubi nga nahilakdan sa buwan sa makadaghang higayon nga wa panumbalinga - mamahimong aslom inay tanlas sa katam-is.
Sama lang sa usa ka kasinatian. Wala lang hibaw-i, magnapulo na diay ka tuig human ko nakagawas sa tunghaan nga maoy naghatod kanako sa himaya nga akong natagamtaman karon. Ikanapulog Lima sa Abril, Usa ka libu, Siyam ka gatos ug Siyaman ug Walo dihang Nisulod ko sa Tunghaan-Balay nga maoy nagiya kanako. Ikaduhaan ug Usa, bulan sa Disyembre, Duha ka Libo ug Usa dihang gitapos ko ang upat ka tuig sa Hayskul(pasensya sa akong binisaya). Daw aso ang panahon, daling gipadpad sa hangin.
Primerong buwan, Tuig Duhaan ka Libo ug Duha dihang nakatrabaho ko isip ordinaryong mamumuo pinaagi sa Giya sa mga Madre nga mao'y nagbantay kanamo sa Tunghaan. Ila akong gitabangan, uban sa akong kaubanan aron makatrabaho sa prestihiyusong syudad sa Lapu-lapu.
Dinhi nagsugod ang akong pagka-aktibo isip gradwado sa maong tunghaan. Ang "The Sisters of Mary". Sa sinugdanan, wa ako'y ideya nga ang maong pagtrabaho ---niadtong tungura -- - - mao diay maglansang sa unsa ug asa kutob ang akong maiskwelahan. Ang akong ambisyon sa pagpadyun ug tungha daling gitikwang sa kakabos, gamayng oportunidad higtan ug latason bisan pa man sa kahagip-ot sa agian. Mao kini ang abrigana sa kinabuhi. Sinugdanan sa umaabot. Kung Unsa man kini, ang Ginoo ra'y nasayud.
No comments:
Post a Comment