Sa Usa ka Higala

Sa atong pagkahimugso ning kalibutana, gikaluhaan na tang daan sa mga suliran. Dunay suliran nga dili nato mapas-an nga mag-inusara- Nagkinahanglan tag katabang aron pagsulbad niani- nangitag tag kauban nga maoy molamdag sa atong huna-huna.

Lain-lain ang mga suliran nga moabot, masulbad ug molabay. May panahon nga gusto natong iisa ang atong mga kamot- iwara ug isibya ang atong pagluhod ug pag-atras sa matag lumba. May mga panahon nga mabuntog ang atong huna-huna sa atong ra usab nga kasing-kasing.

Matag lahugay sa panahon- adunay mga panghitabo nga gusto natong hikalimtan, may mga kasinatian nga gusto natong iluom ug tunawon sa hingpit. May panahon nga sa atong panumduman wa kita'y laing timbayahon kung dili mao ang atong kaugmaon. Gusto kita ug pagbag-o, gusto kita ug kausaban ug naningkamot kita nga makalimot ug moabante sa umaabot. Bisan sa kanihit sa oportunidad amumahon ug sagupon gihapon nato kini aron may mapaabot kita sa ugma kung sa kahigayunan ipabuka pa ang atong mga mata.

Samang kasinatian akong ipasiatab, isibya ug ipatagamtam kaninyo. Usa ka binuhat nga nahaduol na sa akong kasing-kasing.

Dili sayun ang mahimugso ning kalibutan nga hinikawan sa pag-amuma sa mga ginikanan. Dalaygon ang si kinsa man nga nakahuman sa maong pagsulay. Tuo kong kamot ipahiluna sa dughan, dako ang akong respeto ug garbo sa tawo nga karon nagkugi ug may ikapanulti na sa umaabot.

Napulog siyam ka tuig una makit-i sa haduol ang Inahan, Napulog siyam ka katuigan una nagakos sa hugot ang tawo nga mao'y nagbulit ug dugo sa iyang kaugatan ug napulog siyam ka tuig nga pagpugong sa dum-ok sa tubig sa mga Mata. Laing Tulo ka Napulo (30) ka tuig una nakaistorya sa telepono ang amahan. Usa ka kalendaryong dagan sa panahon nga hangtud ning pagsulat - wa pa mahimamat. Dako kong garbo nga nahimong usa sa unang nasayud sa maong kasinatian. Ug kay tipik ako sa maong nindot nga sugilanon, gikalipay ko kini sa hingpit.

Sayud ako nga gusto sa akong higala nga ihilom, ilubong ug ihigot kining maong kasinatian tali lamang kanamong mga Suod nga higala. Maoy iyang gusto nga kini pagatukion lang kung andam na siya nga moatubang sa kadaghanan - ilabi na sa wala magdahum nga mao diay kini karsada o agianan nga iyang gibaktas paingon sa kung hain na siya karon mahimutang. Ug bisan pa man sa maong kasabutan - salig ako nga kining gamayng hinubad dili makabuntog sa unsa may nakapabarog ug unsay naporma sa tagsa-tagsa namo ka balatian. Kini kinutlo lamang- ug unta mahisayran nato ang tanan sa umaabot. Bililhon kini- ug may pagtulun-an.

Higala, sa imong panaw ania ako magauban. Sa imong pakigbatok sa mga pagsulay ania ang imong mga Kahigalaan. Ug labaw sa tanan - Ang Diyos magauban kanato.